Blogg

Årets andre KRIK cup viste seg som ein av dei beste så langt, med svært høgt nivå på laga, mykje folk, stor stemning og ein flott andakt.

Andakten var ved Peter Ijeh, som vitja oss for andre gong. Han ville fortelja oss at Gud kjenner oss alle, han ser kva me gjer og kva som skjer. Han la vekt på at me ikkje må tyngast av det som har skjedd i fortida, og viste til Moses som fyrst måtte flykta frå Egypt fordi han hadde drepe ein egyptar. Sjølv om Moses hadde synda stygt, kunne Gud nytta han og Moses la då det gamle bak seg og såg framover. Han stolte på Gud og vaks som menneske. På same måten må ikkje me la Djevelen få oss til å tyngjast av det som har skjedd tidlegare, men gle oss i Gud og skina som kristne. Ein flott andakt for dei rundt 200 tilhøyrande. I tillegg til å dela Guds ord med oss, delte òg Peter eit par Ijeh-fotballsko med oss, som skulle gå til cupens toppscorar. Me takkar for at Viking-spissen tok turen til oss att, og dersom du treng eit bønneemne må du gjerne be om at han held seg skadefri 🙂

Jenteklassen var delt opp i to grupper med tre lag i kvar. Dei beste laga i kvar klasse kom direkte til semifinalane, medan dei andre laga måtte spela kvalifiseringskampar for å koma dit. Gruppe 1 vart vunnen av Blomsterpikene, som slo Young Ladies på straffekonkurranse. I gruppe 2 var Dei Namnelause suverene, medan Bffe òg kom seg til semifinalane. Gruppevinnarane vann semifinalane sine og møttest i finalen. Den innsatsrike kampen enda 0-0, og i straffekonkurransen trekte Bjerkreims-jentene i Dei Namnelause det lengste strået og kunne innkassera deira fyrste KRIK Cup siger.

Den opne klassen var delt inn i 4 grupper med 4 lag i kvar gruppe. Dei to beste laga i kvar gruppe kom til sluttspelet. At nivået er høgt, kjem tydeleg fram når lag som FK Sandnes (anført av stortalentet Clint Arne Lopez Ocañada) rauk ut allereie i gruppespelet. I kvartfinalane møtte dei lokale heltane i Foreininga For den Blå Songboka (FFBS) sine overmenn i The Red Angels frå Vigrestad. Intolerante Mørkemenn, med ein solid sisteskanse i Anders Primstad, slo FK Mustafunte 4-1 og vart eit av to Bjerkreimslag i semifinalane. Her hadde dei fylgje av ”Ta an du, æg he sting”, som imponerte stort då dei sende River (med mellom andre Berisha-brørne) heim med 0-2 tap. Den fintspelande gjengen i Husabøbingen Ballklubb stod imot presset frå Stian Sleveland sitt storlag WEZC og vart siste laget i semifinalane.

Vigrestad-gjengen The Red Angels har tidlegare vore med to gonger. Fyrste gonga kom dei til kvartfinalen, andre gonga til semifinalen og denne gonga var det knytt høge forhåpningar til dei. Talenta frå Vigrestad, med Ronny S. Egelandsdal i spissen, slo Intolerante Mørkemenn 3-1 og kvalifiserte seg dermed for sin fyrste finale. Der møtte dei sist cup sin tapande finalist, Ta an du, æg he sting. Trass i at klokka var nærmare halv to og laga hadde spelt fem kampar tidlegare, var finalen prega av ein enorm innsats. Jærlaget viste godt samspel og strålande enkeltprestasjonar, medan bjerkreimbuane spelte med hjarta utpå draktene og fekk mange fans. Dei raude englane viste seg til slutt å vera best, og vann 2-1. Etter finalen stod begge laga att med toppscorar med 5 mål. Desse skulle då ta straffekonkurranse om skoa Peter Ijeh hadde med seg. Då Kjell Arve Refsland ikkje klarte å scora på straffen, takka Ronny S. Egelandsdal for sjansen, scora på straffen sin og kunne ta Ijeh-skoa med seg heim.

Etter to cupar er det no interessant å fylgja Maratontabellen. Blomsterpikene er best av jentelaga, medan The Red Angels og Ta an du, æg he sting (bileta under) tronar likt på toppen i den opne klassen.

Vel, 2009-sesongen er no godt i gong! Neste cup er fredag 1. mai kl. 17. Me vonar du tek turen då òg 🙂

Starten på eit nytt KRIK-år viste att nytt år verkeleg kan bringa med seg endring: Av 2008 sine fire beste lag var besteplasseringa FK Mustafunte sin semifinaleplass, medan finalen vart spelt mellom to debutantlag. Aller best var eigersundslaget De Utrolige (biletet), som med godt samspel og lagmoral imponerte med å gå rett til topps! I finalen vann dei 1-0 mot det hardtkjempande bjerkreimslaget Ta an du, æg he sting.

De Utrolige spelte i gruppe med Heroes in Blue, Husabøbingen Ballklubb (anført av tidlegare Heroes in Blue-profil Jone Hansen) og FK Alf. Kombinasjonen keeperskade og svært hard motstand førte til at storlaget Heroes in Blue rauk ut allereie i gruppespelet. Husabøbingen ballklubb kom til kvartfinalen, kor dei møtte sine overmenn i The Red Angels. Englane gav publikummet ei oppvisning i festfotball då dei spelte sin hittil beste kamp på KRIK-cup: Ronny S. Egelandsdal opna showet med ein kanon frå 15 meter, denne gjekk i tverrligger, ned på streken og opp i nettaket att. Ein sterk kandidat til årets mål! Få minuttar seinare punkterte han til 3-0 ved å avslutta eit dribleraid med nok ein susar. Dei talentfulle Vigrestad-gutane viste at dei definitivt har potensiale til å gå heilt til topps i KRIK-cup.

I gruppa til The Red Angels gjekk òg FFBS vidare. Med nye drakter men same intensive og kollektive spelestilen var laget nok ein gong i slag, og cupvinnar De Utrolige trong straffekonk for å slå ut songbok-foreininga. FFBS og The Red Angels spelte i gruppe med BB og Guds Disipler. Sistnevnte, cupens yngste lag, viste lovande takter og kunne med hell ha kome vidare.

Gruppe 3 opna med Intolerante Mørkemenn mot Lanes IL. Oppskriftsmessig vann mørkemennene, noko dei gjentok i resten av gruppespelet. Fjorårets maratontabellvinnar møtte dog si overmakt i kvartfinalen, då FK Mustafunte rett og slett rundspelte bedehusgutane. På andreplass i gruppa kom Ta an du, æg he sting, som så vidt kom vidare på bekostning av imponerande Lanes IL. Morten G. Versland sine utvalde spelte så stor fotball og slo ut både Sandnes FK og The Red Angels før dei altså møtte overmakta frå Eigersund i finalen.

Gruppe 4 var på papiret den hardaste gruppa. Sandnes FK var best, med FK Mustafunte som ein god nummer to, men det hadde ikkje vore rart om Elgen og Bjarhai United hadde vore å finna i eit sluttspel. Det var stilt store forhåpningar til Sandnes FK, men dei talentfulle gutane måtte gje tapt i kvartfinalen. FK Mustafunte viste imponerande takter mot Intolerante Mørkemenn i kvartfinalen, og hadde ein fot i finalen med 1-0 leiing mot De Utrolige, men mista så kontrollen og tapte 1-3.

Jenteklassen baud på fleire jevne oppgjer. I gruppespelet ende Blomsterpikene på topp, føre B-gjengen og Bffe. Dei to beste laga spelte finale. B-gjengen, anført av ei opplagt Ingelin Ognedal, imponerte med underhaldande fotball med mykje god teknikk, og vann finalen 1-0. Bilete av vinnarlaget:

Kveldens viktigaste bidrag stod likevel Magnus Ueland for. 22-åringen som til dagleg spelar i Hønefoss Ballklubb haldt ein flott andakt kor han mellom anna fortalte om korleis han hadde opplevd å vera kristen i fotballmiljøet i Bryne og Hønefoss. Ein flott andakt for eit stort og lyttande publikum. I tillegg til å dela sine opplevingar, delte han òg favoritt-bibelverset Filipparane 4.13 («Alt maktar eg i Han som gjer meg sterk.») med oss.

Dette var ein cup med generelt svært høgt nivå, mykje flott spel og ingen nevneverdige skader. Takk til alle som kom på cupen og bidrog til dette 🙂

Fredag 7. november vart årets siste KRIK fotballcup arrangert. Dermed er vår andre cup-sesong over, og dette har vore nok ein gild sesong, sjølvsagt heilt uavhengig av kven som vann Maratontabellen 🙂

Dette var den fyrste cupen kor det vart arrangert eigen jentecup. Dei fem jentelaga viste gode taktar og det var mange gode og jevne oppgjer. Til slutt vann Blomsterpikene (biletet) gruppa, og fekk med seg Frustrerte fruer i finalen. Gruppevinnaren vann 1-0, og kunne dermed innkassera historiens fyrste siger i jenteklassen, samt ein smakfull premie. Gratulerar!

I den opne klassen var det 16 lag og mange jevne og gode oppgjer. Årets fire store (FFBS, Heroes in Blue, FK Mustafunte og Intolerante Mørkemenn) tok seg vidare fra kva si gruppe. I tillegg imponerte Vaktene med svært bra spel og vann si gruppe. Sandnes FK, hovudsakeleg bjerkreimsgutar, viste òg solide takter. Godt samspel, solid innsats og dei råe fintene og rykka til Arne førte debutantlaget heilt til finalen. To andre debutantlag, Ogna Futsal og The Red Angels, imponerte òg stort og vann gruppene sine føre henhaldsvis Intolerante Mørkemenn og FK Mustafunte.

Sist cup slo FFBS ut Heroes in Blue i kvartfinalen. Denne gonga var det duka for revansje. Det såg lenge ut til å gå mot 1-1 og straffekonk, før ein blåkledd helt avgjorde heilt på tampen. Hellelands-gutane gjekk frå det eine bedehus-laget til det andre, og møtte Intolerante Mørkemenn i semifinalen. Etter ein mållaus kamp og haugevis med straffer missa mørkemennene og dei talentfulle Hellelandsgutane nådde finalen. Der møtte dei altså Sandnes FK. Trass i fartsfylt fotball frå begge laga enda òg denne kampen utan avgjerande scoring, og det måtte straffekonk til. Vinnaren vart Heroes in Blue, som dermed tok nok ein flott cupsiger!

Sidan dette var årets siste cup, skulle Maratontabellen avgjerast. Før cupen hadde Intolerante Mørkemenn 18 poeng, føre FK Mustafunte på andreplass med 13 poeng. Med andre ord skulle det berre eitt poeng til for at mørkemennene skulle vera sikra sigeren. Med 3 poeng vart det totalt 21 poeng og pokalen vart dermed att i Bjerkreim. På dei neste plassane finn me FK Mustafunte, Heroes in Blue og FFBS.

Kveldens andaktshaldar var Clarence Goodson. Den sympatiske 26-åringen frå området rundt Washington DC (USA) fortalte om livet sitt frå før han byrja med fotball til han no var komen til Start. Og om det var mykje som hadde skjedd i livet hans, så var det ein ting som stod fast: Trua på Gud og tilliten til at Han hjelper. Så langt har bøn og hardt arbeid gjort «Clay» til landslagsspelar, Start og Adeccoligaens beste samt ein spanande spelar for Tippeligaen neste år. Med dei supplerande bibelversa 1. Kor 9.24-25, Joh 5.24 og Jeremia 9.23-24 var det ein skikkeleg bra andakt!

Det var ein gild kveld i hallen. Men ein episode var diverre ikkje fullt så gild: Etter ein av kampane førte truleg kombinasjonen av adrenalin og misforståingar til krangel, kor spelarar frå det eine laget var fysisk truande overfor det andre. Dette gav ei utrygg og lei stemning for dei involverte laga. I løpet av kvelden viste heldigvis spelarane seg velvillige og vaksne og skværa opp med kvarandre. Men for å hindra at liknande skal skje att seinare, har styret vedteke følgjande:

– vald fører umiddelbart til utvisning frå cupen/hallen. Dette gjeld uansett kva som har skjedd i forkant. Dersom nokon har ei konflikt kan dei evt. koma til arrangørane for å få hjelp. Å bruka vald for å «løysa» konflikta er heilt uaktuelt.

– det skal vera fleire vaksne til stades i hallen og utføre for å passa på at det ikkje skjer noko gale

For dei som er enormt interesserte i kva som har skjedd på tidlegare cupar, har me her ei kortfatta oppsummering:

Cup 01/07:
Finale: Heroes in Blue – Dei Namnelause 2-0
Andaktshaldar: Børge
Deltakande lag: 9

Cup 02/07:
Finale: Kosmos – Gangzters of Love 1-0
Andaktshaldar: Jarle Mong
Deltakande lag: 12

Cup 03/07:
Finale: Heroes in Blue – Intolerante Mørkemenn 4-2
Andaktshaldar: Sigbjørn Hjorthaug
Deltakande lag: 9

Cup 04/07:
Finale: Kosmos – Leeroy Jenkins 0-0 (Kosmos vinnar av straffekonk)
Andaktshaldar: Peter Ijeh
Deltakande lag: 10

Cup 05/07:
Finale: Heroes in Blue – Intolerante Mørkemenn 0-1
Andaktshaldar: Daniel Førlandsås
Deltakande lag: 15

Cup 01/08:
Finale: Intolerante Mørkemenn – FK Mustafunte 3-0
Andaktshaldar: Bjørn Dahl
Deltakande lag: 15

Cup 02/08:
Finale: Intolerante Mørkemenn – FK Mustafunte 1-3
Andaktshaldar: Vidar Nisja
Deltakande lag: 15

Cup 03/08:
Finale: Heroes in Blue – Intolerante Mørkemenn 2-1
Andaktshaldar: Gustav Kjølberg
Deltakande lag: 15

Cup 04/08:
Finale: Intolerante Mørkemenn – Rosin 1-0
Andaktshaldar: Vegar Landro
Deltakande lag: 18