Blogg

Siste KRIK Fotballcup før sommaren vart halden fredag 7. mai. Av dei 9 laga i herreklassen var det Intolerante Mørkemenn som til slutt gjekk av med sigeren. Dameklassen hadde 4 lag, og endeleg lukkast det for Vrimleveps, som tok sin fyrste siger i KRIK Fotballcup.

I herreklassen var det 9 lag fordelt på to grupper. Gruppe 1 hadde fem lag, kor dei fire beste nådde sluttspelet. Debutantlaget Di Søde, anført av Anders Dversnes, viste raskt at dei ikkje hadde kome til Bjerkreimshallen for å læra. Med effektiv angrepsfotball og disiplinert forsvar har laget det som skal til for å nå langt. Di Søde vann gruppa føre De Optimistiske, eit anna nytt lag som viste gode takter. Gruppe to var ei svært hard gruppe, som til slutt vart vunnen av Intolerante Mørkemenn. Andreplassen i gruppa tok Ballbingen FK. Jøran Vinningland sitt lag har vist solide takter dei siste cupane, og hadde no òg henta inn to gode forsterkningar.

Kvartfinalane starta med at Ballbingen FK gav publikum ein leksjon i attraktiv fotball då dei sende Guds Disipler heim med 0-7 i bagasjen. Den neste kampen vart ein tøffare og meir intensiv kamp, kor Di Søde til slutt kunne jubla over å ha slått Mathias Sæstad sitt gode lag Kvang 1-0. Intolerante Mørkemenn hadde god kontroll mot talenta i Gul Snø, og vann til slutt 4-0. De Optimistiske og FFBS spelte 0-0, og fyrstnevnde vann straffekonken. I semifinalen møtte De Optimistiske hardare motstand og tapte 1-6 mot Intolerante Mørkemenn, som dermed tok seg relativt enkelt til finalen. Den andre semifinalen vart meir spanande: Di Søde tok tidleg kommandoen mot Ballbingen FK og gjekk opp i 2-0 i løpet av fyrste halvdel av 1. omgong. Deretter tok Ballbingen i stor grad over spelet, og pressa stort. Di Søde viste imidlertid svært bra defensiv jobbing, unngjekk baklengs og tok seg til finalen. Finalen mot Intolerante Mørkemenn var nesten ikkje i gong før Di Søde utnytta ein forsvarsfeil og sette inn 1-0. Etter dette pressa mørkemennene på. I siste halvdel av 2. omgong lukkast presset, og utlikninga kom etter hard jobb føre mål. Eit par minuttar seinare vart snuoperasjonen komplett, då ein frisparkvariant enda med eit knallhardt skot nærmast i krysset. Intolerante Mørkemenn vann 2-1 og tok dermed sin fyrste cup-siger på nærmare 2 år. Dei leiar no òg Maratontabellen med 2 poengs forsprang til Ballbingen FK.

Dei fire damelaga spelte i same gruppe og plasseringa der skulle avgjera kven som skulle møtast i semifinalane. Blomsterpikene tok ein oppskriftsmessig gruppesiger etter å ha vunne alle kampane og unngått baklengs. På andre plass kom Riksvei 503. Laget dominert av Reime-jenter har vist ei stigande formkurve dei siste cupane, og gjorde sine saker svært bra. I semifinalen møtte dei Pink Lady, og etter 2-1 siger var Reime & co klare for finalen. Den andre semifinalen vart langt jevnare, og Vrimleveps haldt Blomsterpikene til 0-0 og straffekonk. I straffekonken ville det seg ikkje for Blomsterpikene, og med sikre straffetakarar overraska Vrimleveps og tok seg til finalen. Dei to finalelaga hadde spelt mange cupar tidlegare, men ingen av dei hadde nokon gong vunne. Det skulle visa seg å vera Karoline Sandstøl sine Vrimleveps som tok best vare på sjansen. Med svært god innsats vann dei 2-0 over Riksvei 503 og er dermed regjerande meister og på topp på Maratontabellen fram til neste cup 3. september.

Andakten denne gonga vart halden av Gjermund og Børge, og var ein kombinasjon av lesing av Bibelvers og bilete frå KRIK sitt arbeide for born og unge i Tanzania. Dei over 100 deltakarane på cupen sat musestille og høyrde på, noko me i KRIK set svært stor pris på. «Dei» vil vel eigentleg seia «de», då det vel hovudsakeleg er folk som deltek på cupane som les dette. Så eg får vel eigentleg heller seia det slik: Du og dei andre som kjem er ein utruleg flott gjeng og me er utruleg glade for at de vil koma på cupane våre 🙂

Årets andre KRIK Fotballcup vart arrangert fredag 5. mars. Dei 20 påmelde laga var fordelt på 13 lag i den opne klassen og 7 lag i jenteklassen. Det var med fleire debutantar som utmerka seg: Mad Dogs vann den opne klassen. Black Diamonds var nær ved å vinna jenteklassen. Team Ommund og Kvang tok seg til sluttspelet. Og Ezekiel Bala haldt sin fyrste andakt på imponerande vis.

I den opne klassen var det tre grupper. Gruppe 1 vart vunnen av Ballbingen FK, eit lag med høgt teknisk nivå og som er så samspelt at dei sikkert hadde truffe med pasningane om dei hadde hatt bind for augo. Andreplassen tok Folkevogn IL, medan Gul Snø og Ariana ikkje nådde sluttspelet. Gruppe 2 vart ei svært hard gruppe, kor Red Dogs vann føre storlaga Stars og The Red Angels. The Red Angels kom seg vidare til sluttspelet ved å slå FFBS i kvalifiseringskamp. På sisteplass i gruppa kom debutantlaget Juventus. Gruppe 3 vart vunnen av Intolerante Mørkemenn, som slo Kvang i gruppefinalen. Team Ommund kapra tredjeplassen, medan FFBS berre klarte å slå rivalane Intolerante Mørkemenn og dermed måtte slå følgje med Guds Disipler ut av turneringa.

I den fyrste kvartfinalen slo Intolerante Mørkemenn eit innsatsfylt Folkevogn IL med komfortable 3-0. Deretter tok Ballbingen FK seg vidare ved å slå Team Ommund på straffekonkurranse. Den tredje kvartfinalen, mellom The Red Angels og Mad Dogs, var svært underhaldande og enda 2-2. I straffekonkurransen trekte Mad Dogs det lengste strået. Den siste kvartfinalen viste Stars svært god fotball og vann 3-0 over Kvang.

Den fyrste semifinalen var eit møte mellom talentfulle gutar i Ballbingen FK og rutinerte menn på Intolerante Mørkemenn. Denne kvelden var dei gamle fortsatt eldst og vann 1-0. Men med den utviklinga Ballbingen FK har hatt, bør dei snart vera å finna i ein finale. I den andre semifinalen var det teknikk på høgt nivå og stor innsats frå begge lag. Mad Dogs tok leiinga, men Stars utlikna midt uti andre omgong. Trass i hardt press frå Stars ebba det ut med 1-1, og etter mange straffer frå kvart lag vann til slutt Mad Dogs.

Dermed var det duka for finale mellom rutinerte Intolerante Mørkemenn og debutantlaget Mad Dogs. Debutantane tok initiativet frå start, men mørkemennene tok over presset mot slutten av fyrste omgong. I byrjinga av andre omgong scora Mad Dogs to raske mål. Deretter fekk ein av spelarane deira 2 minuttars utvisning, og mørkemennene pressa og pressa. Dette resulterte i eit sjølvmål og redusering, men utlikninga kom aldri. Dermed vann Mad Dogs finalen, ein imponerande siger frå eit lag med store individuelle prestasjonar og godt samspel.

I jenteklassen var det to grupper. I gruppe 1 vann Black Diamonds føre Vrimleveps, medan Riksvei 503 og The Wild Childs måtte sjå seg utslått. Gruppe 2 bestod av 3 lag, regjerande meister Blomsterpikene, alltid sterke Legendary og dei unge og lovande på Sjå Opp:). Legendary vann gruppa på målskilnad, medan Blomsterpikene og Sjå Opp:) spelte innbyrdes oppgjer om den siste semifinaleplassen. Her måtte det straffekonk til, og bursdagsbornet Rosmari Gåsland vart tunga på vektskåla. I den fyrste semifinalen vart Black Diamonds det fyrste laget til å hindra Blomsterpikene i å nå finalen i ein KRIK Fotballcup. Dette seier litt om Black Diamonds, som imponerte stort på sin fyrste cup. Den andre semifinalen vann Legendary over Vrimleveps. Black Diamonds viste solid nivå òg i finalen, men måtte gje tapt for Legendary. Med 1-0 siger vann dei lokale jentene nok ein cup, og syner kor dyktige dei er. Jentelaga generelt hausta mange lovord blant publikum, men Legendary vakte definitivt oppsikt med sitt bra spel.

Andakten vart halden av Ezekiel Bala (22) frå Bryne FK. Han fortalde om oppveksten sin i ein kristen familie i Nigeria, og korleis Gud har hjulpe han til å nå mange av draumane sine. Bala presiserte kor viktig det er for oss å halda dagleg kontakt med Gud gjennom bøn og bibellesing. Han delte òg fleire av sine favorittvers med oss, mellom anna Davids-salmer, ord frå bergpreika og frå Filipparbrevet. I tillegg hadde han sikkert den kulaste jakken i Rogaland, med eit stort kors på ryggen. Ver med og be om at han held seg skadefri, slik at den sympatiske jærbuen kan nå fleire av draumane sine.

Alt i alt var dette ein gild cup (ok, eg er kanskje ikkje heilt objektiv), og som vanleg oppførte folk seg eksemplarisk og me unngjekk særlege skader. Etter cupen er det svært jevnt på maratontabellane, så dette kan verta eit spanande år med KRIK Fotballcup. Neste cup er fredag 7. mai – me vonar me ser deg då òg 🙂

Årets fyrste KRIK Fotballcup baud på nye lag, overraskande resultatar, god andakt og fortente vinnarlag. I den opne klassen var det på ny FK Mustafunte som stakk av med sigeren. Med deira andre siger på rad har laget, saman med The Red Angels, dominert cupane det siste året. Men alle lokalpatriotar kan likevel gleda seg: Fleire lokale lag viste stor framgang denne gonga. I jenteklassen var Blomsterpikene var suverene, og stadfesta dermed posisjonen som det beste jentelaget på cupane våre.  

Blomsterpikene

I den opne klassen var det 16 lag fordelt på 4 grupper. Jærlaget FK Mustafunte, med fleire Bryne junior-spelarar på laget, vann si gruppe etter overbevisande spel. I kvartfinalen møtte dei lokale Maradonas, med Jostein Merkesdal i mål og ei god blanding unge og rutinerte utespelarar. Maradonas hadde teke seg til sluttspelet ved å ta andreplassen i gruppe 1. Laget kjempa godt og haldt jærbuane til 0-0. Det vart ein spanande straffekonkurranse kor Maradonas, trass i ein potensiell matchvinnar i mål, måtte sjå seg slått av FK Mustafunte. I semifinalen møtte jærbuane debutantlaget Ålgård, som på imponerande vis hadde send både The Red Angels og Intolerante Mørkemenn ut av turneringa. Laget sitt spel var meir kreativt enn namnet, og med litt flaks kunne dei nådd finalen. Ålgård gav FK Mustafunte god kamp, men med utmerka enkeltprestasjonar og samspel var FK Mustafunte best og vann 1-0. I finalen møtte dei FFBS (Foreininga For den Blå Songboka). Laget har dei siste åra gjort mange gode cupar, men aldri før nådd finalen. Etter å ha havna bak FK Mustafunte i gruppespelet, måtte dei ut i ein tøff kvartfinale mot Stars, som var ein av favorittane til å vinna cupen. FFBS kjempa stjernene ut av rytmen og Tore Edland sende bedehusgjengen vidare med ei flott scoring.

I semifinalen var det duka for lokaloppgjer mot Ta An Du, Æg He Sting. Morten Versland sine utvalde kjempa lenge om siger på Maratontabellen i 2009 og stiller alltid eit sterkt mannskap. Denne gonga tok dei seg vidare frå gruppa som nr. 2 bak Ålgård og slo ut det underhaldande laget Ballbingen FK i kvartfinalen. Det var to tende lag som møttest i semifinalen. Kampen vart tøff med voldsom innsats frå begge lag. Ta An Du, Æg He Sting gjekk opp i leiinga, men FFBS kvitterte tidleg. I andre omgong fekk FFBS hjelp av ein motspelar til å gå opp i 2-1, og trass massivt press dei siste minutta klarte ein god FFBS-keeper Kjell Hovland å hindre fleire baklengs. FFBS var dermed klare for finale for fyrste gong på sine 15 cupar.  I finalen tok FK Mustafunte kommando frå start og fekk 1-0 eit stykke ut i fyrste omgong. FFBS hadde så presset fram til talenta frå Jæren kontra inn 2-0 mot slutten av andre omgongen. Det haldt til ein fortent siger for FK Mustafunte, som no har totalt tre cup-sigrar på 13 forsøk.

I jenteklassen var det 4 lag som spelte i ei gruppe. Alle laga gjekk til semifinale, og vinnarlaget i gruppa fekk då lettast motstand. Dei lokale favorittane Blomsterpikene gav seg ikkje før det stod 5-0 mot Hestesko, medan Hellelands-laget Wild in Blue nådde finalen ved å slå Vrimleveps 1-0. Finalen byrja jevnt, og hellelandsjentene hang godt med trass i at Blomsterpikene tok leiinga. I andre omgong scora imidlertid Ane B. Furuseth to raske mål og punkterte kampen. Blomsterpikene vann til slutt 4-0 og fekk revansje for finaletapet i sist cup.

Andaktshaldar var Magne Birkedal. Det var eigentleg ein annan som skulle halda andakt, men då han vart sjuk steppa Birkedal inn på få timars varsel. Han leverte likevel ein flott andakt om det å vera frimodig på dommens dag, det kan me vera av di Jesus har teke domma vår på seg. Eit herleg bodskap!

Etter fyrste cupen er det altså FK Mustafunte som tronar øvst på Maratontabellen for den opne klassen. FFBS ligg hakk i hæl, medan Ta An Du, Æg He Sting har eit greit utgongspunkt og nok er glade for å vera føre The Red Angels. Gjengen frå Vigrestad vert garantert å finna blant dei aller beste i slutten av året, så dette vert interessant! I jenteklassen startar Blomsterpikene året der dei avslutta 2009, på topp på Maratontabellen. Vel, neste cup er fredag 5. mars. Me ser då 🙂

Fotballcupen under KRIK Cup&Konsert 2009 baud på mykje nytt: Totalt 45 lag fordelt på 3 klassar; Open klasse, Jenteklasse og U16-klasse. Her var med lag frå Oslo, Stavanger og elles nesten heile Sør-Rogaland. Her var alt frå nyopprykka adeccoliga-spelarar til bønder som hadde kaffien med på banen. Og ikkje minst var det alltid godt med publikum på tribunen, så det vart liv under kampane.

I den opne klassen var det heile 24 lag fordelt på 5 grupper. Den fyrste gruppa som vart spelt var svært hard, og Elgen – med superjentene Ingelin Ognedal og Trine Selvikvåg på laget – kapra fyrsteplassen. Hajduk Bergen og FK Mustafunte (biletet over) tok dei neste plassane. Desse tre laga tok seg faktisk heilt til semifinalane! I semifinale fann me òg The Red Angels, som før cupen låg svært godt an til å vinna Maratontabellen. Dei møtte FK Mustafunte, og i eit fyrverkeri av ein kamp ende det med 6-1 siger til Mustafunte-gjengen. Men all ære til The Red Angels (biletet under), dei har vore det desidert beste laget på KRIK Bjerkreim sine cupar dette året! I den andre semifinalen imponerte Elgen ved å slå ut Hajduk Bergen, og hallen gjorde seg klare til finalen. FK Mustafunte hadde denne gonga styrka laget med Bjerkreims-duoen Clint Arne Lopez Ocañada og Sacir Tiro. Med sitt vanlege gode samspel og i tillegg gode avsluttarar vart dei for sterke for Elgen. Det er no halvanna år sidan sist FK Mustafunte vann KRIK cup, og det var ein vel unt siger til dei sympatiske gutane.

I jenteklassen, som hadde 9 lag, var Blomsterpikene førehandsfavoritten. Bjerkreimsjentene hadde allereie eit godt forsprang på Maratontabellen og eit svært bra lag. I gruppa si møtte dei The Winner Takes It All, eit Bryne-lag beståande av kretsmeistarar i si aldersgruppe. Blomsterpikene slo dei greit i opningskampen, men begge laga tok seg vidare. I den andre gruppa gjekk (som vanleg) Bffe til sluttspelet. Hellelands-gjengen i Wild in Blue gjorde òg ein solid cup og tok seg til semifinale. Der vann Blomsterpikene og The Winner Takes It All sine kampar og møttest i finalen. Som tidlegare scora Blomsterpikene fyrst. Brynejentene gav dog aldri opp, og etter eit omdiskutert mål enda kampen 1-1. På straffekonkurransen måtte Blomsterpikene gje tapt, og The Winner Takes It All (biletet under) vann sin fyrste KRIK Fotballcup. Imponerande! Blomsterpikene (biletet endå lenger under) gjekk då ikkje heim tomhende, men fekk med pokalen for Maratontabellen i jenteklassen som prov på at dei har vore årets beste jentelag på KRIK Fotballcup.

I U16-klassen viste det seg fort at òg ungdomsskuleelevar kan spela fotball. Med mange samspelte venegjengar viste dei 12 laga at det er mange gode, unge fotballspelarar i regionen. I semifinalane fann me Focus Evangeliehuset (Egersund), Litago (EIK/Bjerkreim), Jan FK og Ålgård 3. Alle laga hadde kvar sine fortrinn; Focus Evangeliehuset hadde ein svært solid keeper, Litago hadde svært gode offensive kvalitetar, Jan FK gav aldri opp og Ålgård 3 hadde gjerne innpå ein spelar for mykje, ein som var frå eit anna lag. Litago og Jan FK tok seg til finalen. Her tok Litago føringa to gonger, men Jan FK kvitterte begge gongene. Det heile måtte avgjerast på straffekonk, og brynegutane viste seg sterkast og sørga for nok ein siger til Jæren.

Eit anna høgdepunkt på cupen var Håkon Eikrem (Intolerante Mørkemenn) sitt mål. Seint laurdag kveld presterte han ein kombinasjon av sakse- og brassespark frå venstre flanke. Ballen fauk kontant i motsatte kryss, til stor jubel frå eit par hundre på tribunen. Målet vart mykje omtalt, og er kanskje det finaste målet som nokon gong er scora i Bjerkreimshallen.

Vel, neste cupen er 8. januar. Då er det ikkje plass til så mange – men 22 lag skal me då alltids få plass til. Vel møtt då – ein kan allereie melda seg på til krikbjerkreim@hotmail.com 🙂

Kveldens andakt var ved Håkon Eikrem. Klebe-spelaren vitna om Guds syn på oss menneske, om at me alle er like høgt elska av Han og at me alle er utstyrt til å gjera dei oppgåvene han har sett oss til. Ein inspirerande andakt av den tidlegare Bjerkreim-strategen.

Vel, då er årets siste «vanlege» KRIK Fotballcup avgjort. Så er det berre å telja ned (og for enkelte av oss koma seg i form) til den siste og største cupen under KRIK Cup&Konsert 🙂

Fredag 1. mai kveld vart årets tredje KRIK Fotballcup halden i Bjerkreimshallen. Dette var siste cupen før sommaren, og det vart ei fin avslutning før ferien: Cupen baud på mykje god fotball, interessant andakt og godt sosialt samver. Vinnar av jenteklassen vart Blomsterpikene, medan The Red Angels som sist vann den opne klassen.

I jenteklassen var det denne gonga rekordhøge 7 lag med, fordelt på to grupper. Gruppe 1 vart vunnen av det spanande debutantlaget Hellvik. Dei lokale favorittane Blomsterpikene hang òg godt med, og klarte gjennom kvalifisering å ta seg til semifinale. Gruppe 2 vart vunnen av Mozell Light, anført av KRIK sin distriktsmedarbeidar Trine Selvikvåg. Då eit lag i den opne klassen ikkje møtte stilte Lye-jentene sporty opp der òg, og fekk rektig slite seg ut på cupen. Vidare frå gruppe 2 kom òg Bffe, som tok seg vidare med betre målskilnad enn Young Ladies. I den fyrste semifinalen imponerte Bffe stort ved å slå ut Hellvik. I den andre semifinalen viste Ane B. Furuseth og co at dei er eit sterkt lag og slo ut Mozell Light etter straffekonk. Finalen mellom Bffe og Blomsterpikene var lenge spanande, og vart avgjort ved Rosmari Gåsland si praktheading. Blomsterjentene vann dermed sin andre siger i KRIK Fotballcup.

I den opne klassen var det 11 lag fordelt på 2 grupper. Gruppe 1 vart vunnen av teknikarane i FK Mustafunte, medan heimefavoritten Ta an du, æg he sting fekk  andre plass. Vidare til kvartfinalane kom òg Sandnes FK og Ballbingen FK. I gruppe 2 måtte målskilnad til for å skilja gruppevinnar Intolerante Mørkemenn frå regjerande meister The Red Angels. Her kom òg FFBS og Heroes in Blue til kvartfinale. FFBS sluttar aldri å imponera med sin enorme innsats som får eitkvart lag ut av rytmen. I kvartfinalane måtte det straffekonkurranse til for å senda FK Mustafunte og The Red Angels vidare, medan dei siste semifinalistane Ta an du, æg he sting og Intolerante Mørkemenn hadde betre kontroll i sine oppgjer. Semifinalane var prega av iherdig innsats og fartsfylt fotball. I den fyrste semifinalen vann The Red Angels 2-1 mot eit FK Mustafunte som med litt flaks kunne fått fleire mål på slutten. I den andre semifinalen møttest bjerkreimslaga Ta and du, æg he sting og Intolerante Mørkemenn til ein kamp prega av vinnarvilje, svette og mjølkesyre. Kjell Arve Refsland pirka inn 1-0, noko som haldt til årets 3. finale for Ta an du, æg he sting. Finalen vart dermed ei reprise frå sist cup. I finalen var The Red Angels, anført av ein opplagt Odd Bjarne Brekke, hakket kvassare enn heimefavoritten, dei vann 3-0 og kunne innkassera sin andre siger på rad. Me gratulerar vinnarlaget og vonar for dei tapande finalistane at alle gode ting er fire 🙂

Andaktshaldar for kvelden var Harald Bøhn. Han hadde eit spanande vitnesbyrd å dela, då han fortalde om korleis Gud hadde bede han ta beina fatt i Afrika og korleis han vart leia på langs gjennom kontinentet. Denne turen brukte han om lag fem år på. Ei inspirerande historie om ein person som verkeleg handlar på Guds ord, noko dei fleste av oss nok kan vera flinkare til.

Når det gjeld Maratontabellane, så er dei no oppdaterte. Kort sagt kan det nemnast at The Red Angels (13 poeng) og Ta an du, æg he sting (12 poeng) har fått ei luke ned til FK Mustafunte og Intolerante Mørkemenn (7 poeng) på i den opne klassen. På jentene sin Maratontabell leier Blomsterpikene (7 poeng) føre Bffe (4 poeng). Me gler oss til å fylgja utviklinga til hausten! Set av datoen 4. september allereie no, så ser me!